ایتن ہولے منصوبہ حکومت کی ترجیح، پانی کے بحران کے حل کی سمت پیش رفت
کولار، چکبالاپور اور بنگلورو رورل میں پینے کے پانی کی فراہمی کا ہدف
بنگلورو 4 فروری (حقیقت ٹائمز)
ریاستی حکومت نے ایتنہولے پینے کے پانی کے منصوبے کے تحت کولار، چکبالاپور اور بنگلورو رورل اضلاع میں پانی کی فراہمی کو 2027 کے اختتام تک یقینی بنانے کے لیے باقی ماندہ کاموں میں تیزی لانے کی ہدایت دی ہے۔ریونیو وزیر کرشنا بائرے گوڑا کی صدارت میں منعقدہ ایک اعلیٰ سطحی مشترکہ اجلاس میں متعلقہ محکموں کے افسران کو ہدایت دی گئی کہ منصوبے سے وابستہ تمام تکنیکی اور انتظامی مراحل کو مقررہ مدت میں مکمل کیا جائے۔اجلاس میں کولار کے ضلع انچارج وزیر بائرتی سریش، چکبالاپور کے ضلع انچارج وزیر ایم سی سدھاکر اور بنگلورو رورل کے ضلع انچارج وزیر کے ایچ منیپا نے شرکت کی۔اجلاس میں اس بات پر زور دیا گیا کہ ایتنہولے منصوبہ حکومت کی جانب سے ان تین اضلاع میں پینے کے پانی کے دیرینہ مسئلے کے حل کے لیے شروع کیا گیا ہے، اور اس مقصد کے حصول کے لیے زیرِ التوا کاموں کی فوری تکمیل ناگزیر ہے۔
وزراء نے واضح ہدایت دی کہ 2027 تک بنگلورو کے اطراف کے اضلاع کو اس منصوبے کے ذریعے پینے کا پانی پہنچنا چاہیے۔حکام نے اجلاس میں آگاہ کیا کہ اس وقت ایتنہولے کا پانی ٹمکورو ضلع کی سرحد تک لانے کا کام جاری ہے۔ آئندہ مرحلے میں، دوڈّبالاپور سے کندانہ کے راستے ایک پائپ لائن کولار اور بنگارپیٹ کی جانب، جبکہ دوسری پائپ لائن چنتامنی اور سرینواس پور کے راستے ملباگل تک بچھائی جائے گی۔ مجموعی طور پر تقریباً 261.90 کلومیٹر طویل پائپ لائن بچھانے کا منصوبہ ہے۔اجلاس میں متعلقہ افسران کو ہدایت دی گئی کہ پائپ لائن بچھانے کے لیے درکار اراضی کے حصول کا عمل فوری طور پر مکمل کیا جائے۔ جہاں زمین کے حصول کے احکامات جاری ہو چکے ہیں، وہاں آبپاشی محکمے کو کام بلا تاخیر شروع کرنے کی ہدایت دی گئی۔اس کے ساتھ ہی، دیہی ترقی اور پنچایت راج محکمہ کو ہدایت دی گئی کہ پانی کی صفائی کے پلانٹس اور دیہات تک پانی کی ترسیل کے لیے درکار پائپ لائنوں سے متعلق تخمینہ اور تجاویز فوری طور پر تیار کر کے منظوری کے لیے پیش کی جائیں۔اجلاس میں اس بات پر اتفاق کیا گیا کہ 2027 کے اختتام تک تینوں اضلاع میں صاف پینے کے پانی کی فراہمی کو یقینی بنانے کے لیے تمام متعلقہ محکمے باہمی تال میل اور مشترکہ حکمتِ عملی کے تحت کام کریں گے۔
Post a Comment