کرناٹک میں مسلمانوں کے لیے 2B زمرے کا 4 فیصد ریزرویشن بحال کیا جائے: مشتاق ہنابیل
مسلم باندوا فورم کا ریاستی حکومت سے مطالبہ؛ سابقہ فیصلے کے جائزے کے لیے فوری اجلاس طلب کرنے پر زور
چکمگلور، 30 ستمبر (فیروز نشیمن)
مسلم باندوا فورم کرناٹک کے ترجمان مشتاق ہنابیل نے ریاستی حکومت سے مطالبہ کیا ہے کہ مسلمانوں کے لیے 2B زمرے کے تحت فراہم کیا جانے والا 4 فیصد ریزرویشن بحال کرنے کے لیے فوری اقدامات کیے جائیں۔چکمگلور پریس کلب میں منعقدہ پریس کانفرنس سے خطاب کرتے ہوئے مشتاق ہنابیل نے الزام عائد کیا کہ 2023 میں بسواراج بومائی کی قیادت والی اُس وقت کی بی جے پی حکومت نے مسلمانوں کے لیے موجود 2B ریزرویشن ختم کرکے اس کا حصہ دیگر طبقات میں تقسیم کردیا تھا۔ انہوں نے اس فیصلے کو سماجی انصاف کے نقطۂ نظر سے قابلِ اعتراض قرار دیتے ہوئے حکومت سے اس معاملے کا ازسرِنو جائزہ لینے کا مطالبہ کیا۔انہوں نے کہا کہ مسلمانوں کو ریزرویشن مذہب کی بنیاد پر نہیں بلکہ سماجی و تعلیمی پسماندگی اور سرکاری ملازمتوں میں مناسب نمائندگی نہ ہونے کی بنیاد پر دیا گیا تھا۔ ان کے مطابق پسماندہ طبقات سے متعلق سابقہ کمیشنوں کی رپورٹس اور سچر کمیٹی کی رپورٹ میں مسلم برادری کی سماجی، تعلیمی اور معاشی صورتِ حال کا بھی جائزہ لیا گیا ہے۔مشتاق ہنابیل نے وزیر اعلیٰ ڈی۔ کے۔ شیوکمار سے مطالبہ کیا کہ سابقہ حکومت کے 2B ریزرویشن سے متعلق فیصلے کا جائزہ لیا جائے اور مسلمانوں کے لیے سابقہ ریزرویشن بحال کرنے کے امکانات پر جامع غور کیا جائے۔ انہوں نے اس سلسلے میں حکومت کی سطح پر خصوصی اجلاس طلب کرنے کی بھی اپیل کی۔انہوں نے کہا کہ ریزرویشن سے متعلق معاملہ سپریم کورٹ میں زیرِ سماعت ہے، اس لیے ریاستی حکومت کی جانب سے کیے جانے والے اقدامات اور فیصلے سے متعلق امور عدالت کے علم میں بھی لائے جانے چاہئیں۔مشتاق ہنابیل نے واضح کیا کہ اگر حکومت 2B ریزرویشن کے معاملے پر واضح فیصلہ نہیں کرتی تو آنے والے دنوں میں ان کی تنظیم دیگر ہم خیال تنظیموں سے مشاورت کرے گی اور آئندہ کے لائحۂ عمل کے ساتھ اپنے سیاسی موقف کا اعلان کرے گی۔پریس کانفرنس میں مولانا عبدالحفیظ قاسمی، ایڈووکیٹ انیس پاشا، صدر ذاکر حسین اوچلا، پرویز ترنہلی، رمضان چھپر بند، عبدالرزاق بیجاپور، اشرف صاحب کنداپور، زبیر احمد، ابراہیم کوٹہ اور ڈاکٹر شفیع اللہ سمیت دیگر افراد موجود تھے۔
Post a Comment