مشترکہ خاندان بزرگوں اور نوجوانوں کے درمیان محبت و تعاون کا ذریعہ: جج راگھویندر اپادھیے
گڈپلی میں بزرگ شہریوں اور خصوصی افراد کے لیے سہولت کیمپ کا انعقاد
بیدر، 4 اکتوبر (جی چندراکانتھ)
ضلع لیگل سرویس اتھارٹی کے ممبر سکریٹری و سینئر سول جج راگھویندر اپادھیے نے کہا کہ والدین کی دیکھ بھال، پرورش اور تحفظ کے حوالے سے ہر فرد میں شعور پیدا کرنے کی ضرورت ہے۔ مشترکہ خاندان میں افراد کو ایک دوسرے سے محبت، دیکھ بھال اور جذباتی تعاون حاصل ہوتا ہے، جس سے خاندانی رشتے مضبوط ہوتے ہیں۔وہ ضلع بیدر کے اوراد (بی) تعلقہ کے گڈپلی گاؤں میں ضلع قانونی خدمات اتھارٹی، تعلقہ قانونی خدمات کمیٹی اور محکمہ بااختیاری برائے بزرگ شہری و خصوصی افراد کے مشترکہ زیر اہتمام منعقدہ ’’بزرگ شہریوں و خصوصی افراد سہولت کیمپ‘‘ اور ’’ایک روزہ بین النسلی تعلقات میلہ‘‘ کا افتتاح کرنے کے بعد خطاب کررہے تھے۔اس موقع پر ضلع بیدر کے معذور افراد و بزرگ شہریوں کے بااختیاری افسر سبھاش رتن نے کہا کہ بزرگوں کے تجربات، مشورے اور رہنمائی نوجوان نسل کے لیے زندگی میں رہنمائی کا ذریعہ بننی چاہیے۔
نوجوانوں کو بزرگوں کے مشوروں سے فائدہ اٹھاتے ہوئے بہتر اخلاق و اقدار اپنانے کی کوشش کرنی چاہیے۔انہوں نے محکمہ کی جانب سے بزرگ شہریوں اور خصوصی افراد کے لیے فراہم کی جانے والی مختلف سہولتوں کے بارے میں بھی معلومات دیں۔ انہوں نے بتایا کہ بزرگ شہری شناختی کارڈ کے ذریعے ہوائی جہاز، ریل اور بس کے سفر میں رعایت، آمدنی ٹیکس میں رعایت اور کفالت الاؤنس جیسی سہولتوں سے استفادہ کیا جاسکتا ہے۔انہوں نے مزید بتایا کہ خصوصی افراد کے لیے محکمہ کی جانب سے 14 مختلف اسکیموں کے لیے آن لائن درخواستیں طلب کی گئی ہیں۔ انہوں نے اہل افراد سے ان اسکیموں سے استفادہ کرنے کے لیے درخواستیں داخل کرنے کی اپیل کی۔علاقائی نقل و حمل دفتر کے افسر جعفر نے خصوصی افراد کے لیے گاڑی چلانے کا لائسنس حاصل کرنے کے طریقہ کار سے متعلق تفصیلات فراہم کیں۔اس موقع پر گڈپلی گرام پنچایت کی ترقیاتی افسر سریکھا، اوراد تعلقہ کے ایم آر ڈبلیو بسوراج دیشمکھ، گڈپلی کے بزرگ شہری اور دیگر افراد موجود تھے۔
Post a Comment