شت دھارا کوآپریٹو سوسائٹی کا دس کروڑ روپے کے کاروبار کا ہدف مقرر
داونگیرے میں نئی شاخ کے قیام پر غور، کسانوں کی معاشی خود کفالت کو ترجیح
چنگری، 12 ستمبر (الطاف رضوی)
کسانوں اور ارکان کے معاشی مفادات کو ترجیح دیتے ہوئے شت دھارا ساؤہاردا کوآپریٹو سوسائٹی لمیٹڈ کو مزید مضبوط بنانے کے لیے نئے منصوبے شروع کرنے اور مالی سال 2026-27 کے دوران ادارے کے مجموعی کاروبار کو 10 کروڑ روپے تک پہنچانے کا ہدف مقرر کیا گیا ہے۔ یہ فیصلہ چنّماجی کمیونٹی ہال میں منعقدہ سوسائٹی کی دوسری سالانہ جنرل باڈی میٹنگ میں کیا گیا۔اجلاس کی صدارت کرتے ہوئے سوسائٹی کے صدر اشوک ڈی پی نے کہا کہ کوآپریٹو ادارے کی ترقی کو صرف مالی اعداد و شمار تک محدود نہیں کیا جانا چاہیے بلکہ اس کا براہِ راست فائدہ ارکان اور کسانوں کی معاشی حالت بہتر بنانے میں نظر آنا چاہیے۔ انہوں نے کہا کہ یہی سوسائٹی کی انتظامیہ کا بنیادی مقصد ہے اور اسی سمت میں مزید منصوبہ بندی کی جا رہی ہے۔انہوں نے بتایا کہ سوسائٹی کے افتتاح کے موقع پر زرعی شعبے کے ماہرین اور تجربہ کار افراد کو مدعو کرکے بیج کے مناسب استعمال، نامیاتی کاشتکاری اور دیگر زرعی امور سے متعلق تربیتی ورکشاپ منعقد کی گئی تھی۔ انہوں نے کہا کہ بزرگ کسانوں کے تجربات اور ماہرین کی رہنمائی کو ارکان تک پہنچانے کے لیے سوسائٹی ایک مؤثر ذریعہ بن سکتی ہے۔
داونگیرے میں نئی شاخ کے قیام پر غور
اشوک ڈی پی نے کہا کہ سوسائٹی کی سرگرمیوں کو نئی سمت دینے کے لیے داونگیرے میں نئی شاخ قائم کرنے پر بھی غور کیا جا رہا ہے۔ اس سلسلے میں وہاں موجود ریٹائرڈ افسران، جمع کنندگان اور ارکان کے تعاون کے ساتھ ساتھ بیرونِ ملک ملازمت کرنے والے مقامی افراد اور کسانوں کے بچوں کو بھی ادارے سے جوڑنے کی کوشش کی جائے گی، تاکہ جمع پونجی اور سرمایہ کاری میں اضافہ کیا جاسکے۔سوسائٹی کے چیف ایگزیکٹو افسر شری گرو این نے سال 2025-26 کی سالانہ رپورٹ پیش کرتے ہوئے بتایا کہ 31 مارچ 2026 تک ادارے کے ارکان کی تعداد 1,016 ہے۔ سوسائٹی کے پاس 15.52 لاکھ روپے کا شیئر سرمایہ، 1.78 کروڑ روپے کی جمع پونجی، 1.43 کروڑ روپے کے قرضے و پیشگی رقومات اور 1.99 کروڑ روپے کا ورکنگ کیپیٹل موجود ہے۔ جمع پونجی اور قرضوں سمیت ادارے کا مجموعی کاروبار 3.22 کروڑ روپے رہا، جبکہ سوسائٹی نے 1.46 لاکھ روپے کا منافع حاصل کیا۔انہوں نے کہا کہ بارش کی کمی، سپاری کی قیمتوں میں گراوٹ، پانی کی قلت اور زرعی پیداوار کی مناسب قیمت نہ ملنا کسانوں کے لیے بڑے چیلنجز ہیں۔ ایسے حالات میں ارکان کو مزید قرض کی سہولت فراہم کرنے، سرمایہ کاری میں اضافہ کرنے اور سوسائٹی کی مالی حالت کو مزید مستحکم بنانے کے اقدامات پر انتظامیہ غور کر رہی ہے۔
اجلاس میں آڈٹ رپورٹ، نفع و نقصان کا حساب، بیلنس شیٹ، آئندہ مالی سال کے بجٹ اور آڈیٹر کی تقرری سمیت مختلف امور پر ارکان نے تفصیلی تبادلۂ خیال کیا اور اپنی تجاویز پیش کیں۔اجلاس کا آغاز ڈائریکٹر پلوّی کی جانب سے مذہبی ترانے کی پیشکش سے ہوا، جس کے بعد سُریکھا نے قومی ترانہ پیش کیا۔ چراغ روشن کرکے اجلاس کا باضابطہ افتتاح کیا گیا، جبکہ مرحوم ارکان کی یاد میں دو منٹ کی خاموشی اختیار کی گئی۔اس موقع پر سوسائٹی کے نائب صدر جی ایس شیو لنگپا، ڈائریکٹرس کرشنپا ٹی آر، ایس آر پرکاش، منجپا ڈی ای، جی ایم ویریندر کمار، دنیش کمار، نازمہ بانو، بی ایچ شانتا، سی ایل پلوّی، بی رنگاسوامی، ناگراج کے او، آر ایس آدرش، کرن ایم جی سمیت مختلف شاخوں کی مشاورتی کمیٹیوں کے اراکین موجود تھے۔
Post a Comment