حج 2027 کے عازمین کے لیے طبی جانچ کا عمل آسان، نجی لیبارٹریوں کی رپورٹس قبول کرنے کی اجازت
محکمہ صحت نے رجسٹرڈ نجی طبی مراکز کی رپورٹس کو فٹنس سند کے لیے قابلِ قبول قرار دے دیا
بنگلورو، 9 ستمبر (حقیقت ٹائمز)
کرناٹک محکمہ صحت و خاندانی بہبود نے حج 2027 کے لیے عارضی طور پر منتخب عازمین کے طبی معائنے اور فٹنس سرٹیفکیٹ کے اجرا کے سلسلے میں اہم سہولت فراہم کی ہے۔ محکمہ نے واضح کیا ہے کہ سرکاری اسپتالوں کے ساتھ کرناٹک نجی طبی مراکز اور نجی لیابس سے حاصل کی گئی مقررہ طبی جانچ کی رپورٹس کو بھی فٹنس سرٹیفکیٹ جاری کرنے کے مقصد سے قبول کیا جاسکتا ہے۔محکمہ صحت و خاندانی بہبود کے ڈائریکٹوریٹ کی جانب سے 9 ستمبر کو جاری کردہ سرکلر میں کہا گیا ہے کہ ریاست کے تمام تعلقہ اور ضلعی اسپتالوں، بشمول سرکاری طبی کالجوں سے وابستہ اسپتالوں، میں حج 2027 کے لیے عارضی طور پر منتخب عازمین کے طبی معائنے اور صحتی سند جاری کرنے کا عمل شروع ہوچکا ہے۔
بنگلورو میں وکٹوریہ اسپتال، بورنگ اینڈ لیڈی کرزن اسپتال، کے سی جنرل اسپتال، جے نگر جنرل اسپتال اور سری سی وی رامن جنرل اسپتال میں بھی یہ سہولت فراہم کی گئی ہے۔سرکلر کے مطابق عازمین کے طبی معائنے کے دوران خون کی مکمل جانچ، خون میں شکر کی سطح، ذیابیطس سے متعلق مخصوص جانچ، گردوں کے افعال، جگر کے افعال، سینے کا ایکسرے اور قلب کی برقی جانچ (ای سی جی) سمیت مقررہ تشخیصی جانچ ضروری ہے۔ابتدائی ہدایات کے مطابق یہ تمام جانچ سرکاری اسپتالوں میں کرانے کی بات کہی گئی تھی، تاہم عازمین کو سہولت فراہم کرنے اور طبی جانچ کے عمل کو آسان بنانے کے پیش نظر اب کرناٹک پرائیویٹ میڈیکل اسٹیبلشمنٹس ایکٹ کے تحت باقاعدہ رجسٹرڈ نجی طبی مراکز اور نجی تشخیصی لیابس کی رپورٹس بھی قبول کرنے کی اجازت دی گئی ہے۔محکمہ نے متعلقہ ضلعی ہیلتھ افسران اور اسپتالوں کے سربراہان کو ہدایت دی ہے کہ نجی طبی مرکز یا تشخیصی لیابس کی رپورٹ قبول کرنے سے قبل اس کے متعلقہ قانون کے تحت رجسٹریشن کی تصدیق یقینی بنائی جائے۔ فٹنس سرٹیفکیٹ جاری کرنے کے مجاز افسر کی ذمہ داری ہوگی کہ وہ متعلقہ نجی ادارے کا رجسٹریشن اور مقررہ ضوابط کی پابندی کی جانچ کرلے۔ریاستی عازمین حج کے صحت و ٹیکہ کاری کیمپ کے نوڈل افسر ڈاکٹر محمود شریف نے جاری کردہ سرکلر کے ذریعے تمام اضلاع کے ضلعی صحت افسران اور بنگلورو کے متعلقہ سرکاری اسپتالوں کے طبی سپرنٹنڈنٹس کو ان ہدایات پر عمل درآمد یقینی بنانے کی ہدایت دی ہے۔محکمہ صحت کے اس فیصلے سے عازمین کو طبی جانچ کے لیے سرکاری اسپتالوں پر انحصار کرنے کے بجائے باقاعدہ رجسٹرڈ نجی طبی مراکز سے مقررہ جانچ کرانے کا متبادل بھی دستیاب ہوگا، جس سے حج کے لیے درکار طبی تصدیق کے عمل میں آسانی پیدا ہونے کی توقع ہے۔
Post a Comment