گڈپلی میں مفت طبی کیمپ کے ذریعے صحت اور قانونی بیداری کا پیغام
سینئر سول جج راگھویندر اپادھیے کی شرکت، دیہی باشندوں کو صحت و قانونی سہولتوں سے آگاہ کیا گیا
بیدر، 9 ستمبر (جی چندراکانتھ)
قومی لیگل سرویس اتھارٹی کی ہدایت پر ضلعی لیگل سرویس اتھارٹی، تعلقہ قانونی خدمات کمیٹی اور تعلقہ محکمۂ صحت کے مشترکہ زیرِ اہتمام منگل کے روز گڈپلی گاؤں میں مفت صحت و طبی معائنے کے کیمپ کا انعقاد عمل میں آیا۔ ضلعی لیگل سرویس اتھارٹی کے ممبر سکریٹری اور سینئر سول جج راگھویندر اپادھیے نے کیمپ کا افتتاح کیا۔یہ کیمپ 60 روزہ وسیع قانونی بیداری مہم کے ایک حصے کے طور پر منعقد کیا گیا۔ اس موقع پر خطاب کرتے ہوئے راگھویندر اپادھیے نے کہا کہ ہر انسان کے لیے صحت سب سے قیمتی سرمایہ ہے، اس لیے باقاعدگی سے صحت کا معائنہ کرانا ضروری ہے۔ انہوں نے گاؤں کے تمام باشندوں سے اپیل کی کہ وہ اس مفت طبی کیمپ سے بھرپور استفادہ کریں اور اپنی صحت کے بارے میں باقاعدگی سے توجہ دیں۔
سینئر سول جج حسین صاحب یادواڑ نے مفت طبی کیمپ کے مقاصد کے علاوہ قومی قانونی خدمات اتھارٹی کی جانب سے عوام کے لیے فراہم کی جانے والی مختلف قانونی سہولتوں اور فلاحی منصوبوں کے بارے میں تفصیلی معلومات فراہم کیں۔تعلقہ صحت افسر ڈاکٹر انیل ایکلور نے دیہی عوام کو صحت مند زندگی گزارنے کے لیے ضروری احتیاطی تدابیر اور بہتر طرزِ زندگی اختیار کرنے کے حوالے سے مفید مشورے دیے۔ انہوں نے متوازن غذا، باقاعدہ صحت کی جانچ اور صحت مند عادات اپنانے کی اہمیت پر زور دیا۔کیمپ میں گرام پنچایت ترقیاتی افسر سوریکھا، تعلقہ محکمۂ صحت اور قانونی خدمات اتھارٹی کے عملے، آشا کارکنان اور گڈپلی گاؤں کے باشندوں نے شرکت کی۔
Post a Comment