ہاسن ضلع کلکٹر دفتر کی عمارت 2 ماہ میں مکمل کرنے کی ہدایت: کے۔ ایم۔ شیو لنگے گوڈا
اضافی اخراجات محکمہ تعمیراتِ عامہ اور محکمہ محصولات 50،50 فیصد برداشت کریں گے
بنگلورو، 31 اگست (حقیقت ٹائمز)
ہاسن ضلع کلکٹر دفتر کی عمارت کے احاطے کا تعمیراتی کام آئندہ دو ماہ کے اندر مکمل کرکے افتتاح کے لیے تیار کیا جائے۔ ہاسن ضلع کے نگران وزیر اور وزیر آبکاری کے۔ ایم۔ شیو لنگے گوڈا نے افسران کو یہ سخت ہدایت دی۔وزیر کی صدارت میں آج وکاس سودھا میں ہاسن ضلع کلکٹر دفتر کے عمارت کے احاطے کے تعمیراتی کام کی پیش رفت کا جائزہ لینے کے لیے اجلاس منعقد ہوا۔ اجلاس میں ہاسن کی ڈپٹی کمشنر کے۔ ایس۔ لتا کماری نے عمارت کے تعمیراتی کام کی موجودہ صورتحال سے وزیر کو آگاہ کیا۔
کے۔ ایم۔ شیو لنگے گوڈا نے کہا کہ یوم آزادی کے موقع پر انہوں نے عوام سے وعدہ کیا تھا کہ ضلع کلکٹر دفتر کی عمارت کا جلد افتتاح کرکے اسے عوام کے استعمال کے لیے دستیاب کرایا جائے گا۔ انہوں نے کہا کہ حکومت کی جانب سے کیے گئے وعدے کو پورا کرنا ضروری ہے اور یہ حکومت کی ساکھ کا معاملہ بھی ہے۔ اس لیے افسران صورتحال کی اہمیت کو سمجھتے ہوئے تعمیراتی کام کو تیز رفتاری سے مکمل کریں۔اجلاس میں جب افسران نے منظور شدہ بجٹ سے زائد رقم خرچ ہونے کا مسئلہ وزیر کے علم میں لایا تو انہوں نے ہدایت دی کہ اضافی رقم کا 50 فیصد محکمہ تعمیراتِ عامہ اور باقی 50 فیصد محکمہ محصولات برداشت کرے۔ دونوں محکموں کے افسران نے وزیر کی ہدایت سے اتفاق کرتے ہوئے فوری طور پر رضامندی ظاہر کی۔ وزیر نے اضافی اخراجات سے متعلق مکمل تفصیلات بھی پیش کرنے کی ہدایت دی۔افسران نے بتایا کہ عمارت کی دو منزلوں کا تعمیراتی کام تقریباً مکمل ہوچکا ہے، جبکہ تیسری منزل کی تعمیر سے متعلق کام جاری ہے۔ اس پر وزیر نے کہا کہ وہ خود تعمیراتی مقام کا دورہ کرکے کام کا معائنہ کریں گے اور تیسری منزل کی ضرورت کے ساتھ ساتھ عمارت میں فراہم کی جانے والی بنیادی سہولتوں کے معیار کا بھی جائزہ لیں گے۔ہاسن امبا جشن کے بارے میں وزیر نے کہا کہ اس سال یہ جشن گزشتہ سال کے مقابلے میں مزید شاندار پیمانے پر منایا جائے گا۔ انہوں نے متعلقہ افسران کو جشن کے انتظامات بھی مؤثر انداز میں انجام دینے کی ہدایت دی۔اجلاس میں محکمہ جات کے اعلیٰ افسران، سینئر انجینئرز، ٹھیکیدار اور دیگر متعلقہ افراد موجود تھے۔
Post a Comment