ٹمکورو میں ریل بنانے کی کوشش خوفناک حادثے میں بدل گئی
دیوراینا درگہ کی خطرناک چٹان سے گرنے والے کالج لیکچرار شدید زخمی، عوام کو وارننگ
ٹمکورو، 28 جون (حقیقت ٹائمز)
سوشل میڈیا پر ریلز بنانے کے بڑھتے ہوئے رجحان نے ایک اور افسوسناک حادثے کو جنم دیا۔ ٹمکورو ضلع کے دیوراینا درگہ پہاڑی مقام پر ریل بنانے کی کوشش کے دوران ایک کالج لیکچرار خطرناک چٹان سے پھسل کر نیچے گر گئے، جس کے نتیجے میں وہ شدید زخمی ہوگئے۔زخمی کی شناخت شیو پرساد کے طور پر ہوئی ہے، جو ٹمکورو تعلقہ کے بلّاپور کے رہنے والے ہیں اور اس وقت ارسیکیرے کے ایک پری یونیورسٹی کالج میں لیکچرار کی حیثیت سے خدمات انجام دے رہے ہیں۔
اطلاعات کے مطابق اتوار، 28 جون کو تعطیل کے باعث شیو پرساد دیوراینا درگہ کی سیر کے لیے گئے تھے۔ اس دوران انہوں نے مندر کے عقب میں واقع ایک نہایت خطرناک چٹان پر چڑھ کر موبائل فون سے ریل بنانے کی کوشش کی۔ ویڈیو ریکارڈنگ کے دوران اچانک ان کا پاؤں پھسل گیا اور وہ بلندی سے نیچے جا گرے۔حادثہ دیکھتے ہی وہاں موجود سیاحوں اور مقامی افراد نے فوری طور پر امدادی کارروائی کرتے ہوئے انہیں بحفاظت نکالا۔ اگرچہ وہ خوش قسمتی سے جان لیوا حادثے سے بچ گئے، تاہم ان کی دونوں ٹانگوں میں شدید چوٹیں آئی ہیں۔زخمی لیکچرار کو فوری طور پر ٹمکورو ضلع اسپتال منتقل کیا گیا، جہاں انتہائی نگہداشت وارڈ (آئی سی یو) میں ان کا علاج جاری ہے۔اس واقعے کے بعد پولیس اور مقامی انتظامیہ نے عوام، خصوصاً نوجوانوں اور سیاحوں سے اپیل کی ہے کہ سوشل میڈیا کے لیے ریلز یا ویڈیوز بنانے کی خاطر خطرناک مقامات پر جان جوکھم میں ڈالنے سے گریز کریں، کیونکہ چند لمحوں کی لاپرواہی زندگی بھر کے نقصان کا سبب بن سکتی ہے۔
Post a Comment