سرینواس پور میں 6 کروڑ روپے کے ترقیاتی منصوبوں کا آغاز
عوامی خدمت اور بنیادی سہولتوں کی فراہمی حکومت کی اولین ترجیح: جی۔کے۔ وینکٹ شیواریڈی
سرینواس پور، 13 جون (شبیر احمد)
سرینواس پور شہر میں ٹاؤن ڈیولپمنٹ اسکیم کے تحت تقریباً 6 کروڑ روپے کی لاگت سے مختلف ترقیاتی منصوبوں کا آغاز کیا گیا۔ اس موقع پر رکن اسمبلی جی۔کے۔ وینکٹ شیواریڈی نے متعدد ترقیاتی کاموں کا سنگ بنیاد رکھتے ہوئے کہا کہ عوام نے جس اعتماد اور محبت کے ساتھ انہیں کامیاب بنایا ہے، وہ اس اعتماد پر پورا اترنے کے لیے مسلسل کوشاں ہیں اور عوامی خدمت کو اپنی اولین ترجیح سمجھتے ہیں۔انہوں نے کہا کہ شہر کے مختلف وارڈوں میں سڑکوں، نکاسیٔ آب کی نالیوں اور دیگر بنیادی ڈھانچے کی تعمیر و ترقی کے منصوبے شروع کیے گئے ہیں، جن کا مقصد شہریوں کو بہتر بنیادی سہولتیں فراہم کرنا اور شہر کی مجموعی ترقی کو یقینی بنانا ہے۔ انہوں نے کہا کہ حکومت عوامی ضروریات کو پیشِ نظر رکھتے ہوئے ترقیاتی کام انجام دے رہی ہے تاکہ شہری علاقوں میں بنیادی ڈھانچہ مزید مضبوط اور معیاری بنایا جا سکے۔رکن اسمبلی نے تعمیراتی ایجنسیوں اور ٹھیکہ داروں کو ہدایت دی کہ تمام کام اعلیٰ معیار اور پائیداری کے ساتھ مکمل کیے جائیں تاکہ عوام کو طویل عرصے تک ان منصوبوں کا فائدہ حاصل ہو۔ انہوں نے اس بات پر بھی زور دیا کہ سرکاری فنڈز سے انجام دیے جانے والے کاموں کی نگرانی میں مقامی شہری غیر جانبدارانہ طور پر حصہ لیں تاکہ شفافیت برقرار رہے اور کسی بھی قسم کی بے ضابطگی یا ناقص کام کی روک تھام ممکن ہو سکے۔انہوں نے عوام سے اپیل کی کہ وہ حکومت کی فلاحی اور ترقیاتی اسکیموں کو مستحق افراد تک پہنچانے میں تعاون کریں اور شہر کی ترقی کے سفر میں فعال کردار ادا کریں۔اس موقع پر بی جے پی کے ضلع سابق صدر ڈاکٹر کے۔این۔ وینوگوپال، بی۔وی۔ ریڈی، ہلے پیٹے منجوناتھ ریڈی، کار سریناتھ بابو، پول شیوا ریڈی، تھیٹر لکشمن ریڈی، بندو سرینواس ریڈی، سی۔ روی، شبیر خان، عائشہ نیاز، عطا اللہ خان، انور اسلام، ایس۔ مولا، اعجاز پاشا، شنکر ریڈی، اپور راجو، منجوناتھ، آٹو جگگو اور انجینئر سرینواس سمیت متعدد قائدین، عوامی نمائندے اور مقامی شہری موجود تھے۔
Post a Comment