ممبئی پہنچے 371 حجاج کرام کا سامان سعودی عرب میں رہ گیا
حج کمیٹی آف انڈیا کا سعودی ایئرلائن کو شوکاز نوٹس
ممبئی، 4 جون (خصوصی رپورٹ)
حج کمیٹی آف انڈیا نے سعودی عرب سے ممبئی پہنچنے والی ایک حج پرواز کے ساتھ پیش آنے والے غیر معمولی واقعے پر سخت برہمی کا اظہار کرتے ہوئے متعلقہ ایئرلائن کو شوکاز نوٹس جاری کر دیا ہے۔حج کمیٹی کے مطابق سعودی ایئرلائن کی پرواز ایس وی-5936 آج صبح ممبئی پہنچی، جس میں حج کمیٹی آف انڈیا کے تحت سفر کرنے والے 371 حجاج کرام سوار تھے، تاہم پرواز کے ساتھ کسی بھی مسافر کا چیک اِن شدہ سامان ممبئی نہیں پہنچا۔حج کمیٹی نے اپنے بیان میں کہا کہ ایئرلائن کی جانب سے نہ تو پہلے سے کسی قسم کی اطلاع دی گئی اور نہ ہی سامان کی عدم دستیابی کے بارے میں متعلقہ حکام کو آگاہ کیا گیا، جس کے باعث حجاج کرام کو شدید پریشانی کا سامنا کرنا پڑا۔کمیٹی نے اس واقعے کو ایک سنگین انتظامی کوتاہی قرار دیتے ہوئے سعودی ایئرلائن کو فوری طور پر شوکاز نوٹس جاری کیا ہے اور اس معاملے پر وضاحت طلب کی ہے۔بیان کے مطابق حج کمیٹی آف انڈیا صورتحال پر مسلسل نظر رکھے ہوئے ہے اور ایئرلائن کو ہدایت دی گئی ہے کہ تمام حجاج کا سامان جلد از جلد ان کے گھروں تک براہِ راست پہنچایا جائے تاکہ انہیں مزید زحمت نہ اٹھانی پڑے۔حج کمیٹی نے یقین دلایا ہے کہ متاثرہ حجاج کرام کے مفادات کے تحفظ کے لیے تمام ضروری اقدامات کیے جا رہے ہیں اور سامان کی ترسیل کے عمل کی نگرانی بھی کی جا رہی ہے۔کمیٹی نے اس واقعے پر افسوس کا اظہار کرتے ہوئے کہا کہ حجاج کرام کو پیش آنے والی تکلیف اور پریشانی پر گہرا رنج ہے اور متعلقہ اداروں سے جوابدہی یقینی بنائی جائے گی۔حج ذرائع کے مطابق حج سیزن کے اختتامی مرحلے میں ہزاروں حجاج مختلف پروازوں کے ذریعے وطن واپس لوٹ رہے ہیں، ایسے میں سامان کی مکمل عدم موجودگی کا یہ واقعہ انتظامی حلقوں میں بھی تشویش کا باعث بنا ہے۔ حج کمیٹی کی جانب سے جاری شوکاز نوٹس کے بعد معاملے کی باضابطہ جانچ اور ذمہ داریوں کے تعین کی توقع کی جا رہی ہے۔
Post a Comment