بیدر کے ہر گاؤں تک صاف پانی اور معیاری سڑکیں پہنچائیں گے: ایشور کھنڈرے
کھاد کی کالابازاری پر سخت کارروائی، جل جیون مشن کے کام دو ماہ میں مکمل کرنے کی ہدایت
بیدر، 17 جون (جی چندراکانتھ)
ریاستی وزیر برائے دیہی ترقی و پنچایت راج ایشور بی۔ کھنڈرے نے کہا ہے کہ بیدر ضلع کے ہر گاؤں کو صاف پینے کے پانی کی فراہمی اور آخری بستی تک معیاری سڑکوں کی تعمیر حکومت کا عزم ہے اور اس مقصد کے حصول کے لیے تمام متعلقہ محکموں کو تیز رفتاری سے کام کرنے کی ہدایت دی گئی ہے۔وہ پیر کے روز بیدر میں منعقدہ ایک ہنگامی جائزہ اجلاس کی صدارت کر رہے تھے، جس میں مون سون سیزن کے لیے بیج اور کھاد کی فراہمی، انسانوں اور مویشیوں کے لیے پینے کے پانی کی دستیابی، دیہی سڑکوں کی تعمیر اور دیگر اہم امور کا تفصیلی جائزہ لیا گیا۔اجلاس کے دوران وزیر نے مون سون کی صورتحال، زرعی سرگرمیوں، بیج اور کھاد کی دستیابی، جل جیون مشن کے تحت جاری منصوبوں اور سڑکوں کی تعمیراتی کاموں پر تفصیلی تبادلۂ خیال کیا۔ایشور کھنڈرے نے ضلع میں کھاد کی قلت پر سخت ناراضگی کا اظہار کرتے ہوئے متعلقہ افسران کو ہدایت دی کہ کھاد کی کالابازاری میں ملوث افراد کے خلاف قانون کے مطابق سخت کارروائی کی جائے۔ انہوں نے کہا کہ کسانوں کو بروقت کھاد اور بیج کی فراہمی یقینی بنانا حکومت کی اولین ترجیح ہے۔انہوں نے جل جیون مشن کے تحت زیر التوا تمام منصوبوں کو آئندہ دو ماہ کے اندر مکمل کرنے کی ہدایت دیتے ہوئے کہا کہ ضلع کے ہر گاؤں تک صاف پینے کا پانی پہنچنا چاہیے۔ وزیر نے خبردار کیا کہ کسی بھی صورت میں دیہات کو آلودہ پانی فراہم نہیں کیا جانا چاہیے اور اگر اس معاملے میں کسی قسم کی غفلت پائی گئی تو متعلقہ افسران کو براہِ راست ذمہ دار ٹھہرایا جائے گا۔وزیر نے ضلع میں مختلف منصوبوں کے تحت جاری سڑکوں کی تعمیر کے کاموں کو بھی جلد مکمل کرنے کی ہدایت دی۔ انہوں نے "نمّا ہولا، نمّا داری" (ہمارا کھیت، ہماری سڑک) اسکیم کے تحت تمام تعلقوں میں زرعی زمینوں کو سڑکوں سے جوڑنے کے لیے ایک ہفتے کے اندر تفصیلی تجاویز پیش کرنے کا حکم دیا۔اجلاس میں ضلع کمشنر شلپا شرما، ضلع پنچایت کے چیف ایگزیکٹو آفیسر گریش دلیپ بدولے، سپرنٹنڈنٹ آف پولیس پردیپ گنٹی، ایڈیشنل ڈپٹی کمشنر شیوانند بی۔ کرالے، محکمہ زراعت کی جوائنٹ ڈائریکٹر دیویکا آر۔ اور مختلف محکموں کے اعلیٰ افسران شریک تھے۔
Post a Comment