تُنگبھدرا ڈیم کے 33 گیٹس کی مرمت مکمل، 15 مئی تک افتتاح کا ہدف
ڈی۔کے۔ شیوکمار کا معائنہ، تین سو پندرہ کروڑ کی لاگت سے ڈیم کی عمر پچاس سال بڑھنے کی امید
وجے نگر (ہوسپیٹ)، 4 مئی (جی چندراکانتھ)
تُنگبھدرا ڈیم کے تمام 33 کریسٹ گیٹس کی ہنگامی مرمتی کارروائیاں آخری مرحلے میں داخل ہو چکی ہیں۔ نائب وزیرِ اعلیٰ و وزیرِ آبپاشی ڈی۔کے۔ شیوکمار نے ڈیم پر جاری کاموں کا معائنہ کرتے ہوئے 15 مئی تک مکمل کر کے باضابطہ افتتاح کرنے کا اعتماد ظاہر کیا۔میڈیا سے گفتگو کرتے ہوئے انہوں نے بتایا کہ 33 گیٹس میں سے 22 پر سلائس پلیٹس کی تنصیب مکمل ہو چکی ہے۔ ماہرین کی رپورٹ کے مطابق پرانی چینیں مضبوط ہیں، تاہم احتیاطی تدابیر کے طور پر نئی چینیں لگانے کا فیصلہ کیا گیا ہے۔ نئی چینوں کا پہلا سیٹ 7 مئی کو پہنچے گا اور مئی کے اختتام تک مکمل تنصیب کا عمل ختم ہو جائے گا۔انہوں نے کہا کہ آنے والے مون سون کو مدنظر رکھتے ہوئے حکام کو ہدایت دی گئی ہے کہ 15 مئی تک تمام کام مکمل کر لیے جائیں۔ ریکارڈ مدت میں 33 گیٹس کی مرمت ایک مثالی کارنامہ ہے۔ اس منصوبے پر گیٹس کی مرمت کے لیے تقریباً 54 کروڑ روپے جبکہ نہروں اور دیگر زیریں سطح کے کاموں پر مجموعی طور پر 315 کروڑ روپے خرچ کیے گئے ہیں۔ماہرین کے مطابق ان مرمتی کاموں سے ڈیم کی عمر میں مزید 50 سال کا اضافہ متوقع ہے۔ انہوں نے بتایا کہ ڈیم میں جمع شدہ گاد کے باعث اس کی ذخیرہ کرنے کی صلاحیت 105 ٹی ایم سی سے کم ہو کر 100 ٹی ایم سی رہ گئی ہے۔ گاد نکالنے کے لیے جدید بین الاقوامی ٹیکنالوجی کے استعمال پر غور کیا جا رہا ہے اور اس سلسلے میں عالمی ٹینڈر جاری کرنے کی تیاری ہے۔
نائب وزیرِ اعلیٰ نے یہ بھی کہا کہ ڈیم کے اطراف صنعتی یونٹوں سے آلودہ پانی داخل ہونے کی اطلاعات پر سخت کارروائی کی جائے گی۔ اس سلسلے میں متعلقہ افسران سے تفصیلی رپورٹ طلب کی گئی ہے۔انہوں نے مزید بتایا کہ کرناٹک اور آندھرا پردیش ریاستیں اس منصوبے میں بالترتیب 64:34 کے تناسب سے سرمایہ کاری کر رہی ہیں، جبکہ ڈیم بورڈ کو مکمل خودمختاری دی گئی ہے۔ حکومت کسانوں کے مفادات کے تحفظ اور آبی ذخائر کی سلامتی کے لیے پوری طرح پابند عہد ہے۔اس موقع پر ریاستی وزراء، ارکانِ پارلیمان، ارکانِ اسمبلی اور اعلیٰ سرکاری افسران بھی موجود تھے۔
Post a Comment