Karnataka Haj Committee Staff Pension Demand Approved ریٹائرڈ ملازمین میں خوشی کی لہر

کرناٹک اسٹیٹ حج کمیٹی ملازمین کی پنشن مانگ منظور

ریٹائرڈ ملازمین میں چیکس کی تقسیم، خوشی کی لہر

بنگلورو، 25 مارچ (حقیقت ٹائمز)

 کرناٹک اسٹیٹ حج کمیٹی کے ملازمین کی طویل عرصہ سے زیر التوا پنشن کی مانگ بالآخر منظور کر لی گئی، جس کے نتیجے میں ریٹائرڈ ملازمین میں خوشی کی لہر دوڑ گئی ہے۔اس سلسلے میں پنشن چیکس کی باضابطہ تقسیم عمل میں آئی، جسے ایک تاریخی پیش رفت قرار دیا جا رہا ہے۔ اس اقدام کے ذریعے ملازمین کی برسوں کی خدمات کو باضابطہ طور پر تسلیم کیا گیا ہے۔یہ اہم کامیابی ریاستی وزیر برائے اقلیتی بہبود و ہاؤسنگ ضمیر احمد خان اور وزیر حج رحیم خان کی رہنمائی اور تعاون سے ممکن ہوئی۔خصوصی طور پر کمیٹی کے چیئرمین ذوالفقار احمد ٹیپو کی مسلسل کوششوں، ذاتی دلچسپی اور بھرپور پیروی کو اس کامیابی کا اہم سبب قرار دیا جا رہا ہے۔ ان کی انتھک محنت کے بغیر یہ دیرینہ مسئلہ حل ہونا ممکن نہیں تھا۔اسی طرح ایگزیکٹو آفیسر جیلانی موکاشی کی انتظامی معاونت اور تعاون کو بھی سراہا گیا، جنہوں نے اس عمل کو مؤثر انداز میں مکمل کرنے میں اہم کردار ادا کیا۔اس پنشن سہولت سے مستفید ہونے والے ریٹائرڈ ملازمین میں حمید خان وی اے، شاہدہ پروین، محبوب پاشا، فیروز پاشا اور ابراہیم خان شامل ہیں۔اس موقع پر ریٹائرڈ ملازمین  نے تمام متعلقہ وزراء، عہدیداران اور ذمہ داران کا تہہ دل سے شکریہ ادا کرتے ہوئے کہا کہ اس اقدام سے انہیں نہ صرف مالی تحفظ حاصل ہوا بلکہ ایک طویل عرصہ سے جاری تشویش کا خاتمہ بھی ہوا ہے۔انہوں نے تمام ذمہ دار شخصیات کے تئیں خصوصی تشکر کا اظہار کرتے ہوئے کہا کہ ان کی سنجیدگی، لگن اور ملازمین کی فلاح و بہبود کے جذبے نے اس مسئلہ کو حل کرنے میں کلیدی کردار ادا کیا ہے۔