حج 2026 عازمین کے لیے نئی سہولت، پاسپورٹ جمع کرانے کی شرط ختم
سفر کو آسان بنانے کے لیے اہم ہدایات اور دستاویزات کی وضاحت
ممبئی، 18 مارچ (حقیقت ٹائمز)
حج کمیٹی آف انڈیا نے حج 2026 (1447 ہجری) کے عازمین کے لیے اہم ہدایات اور تازہ اپڈیٹس جاری کرتے ہوئے سفر کو آسان، محفوظ اور بغیر کسی پریشانی کے بنانے کی کوشش کی ہے۔یہ سرکلر وزارتِ اقلیتی امور (وزارتِ اقلیتی امور) کے تحت جاری کیا گیا ہے، جس میں عازمین کو مختلف اہم امور پر رہنمائی فراہم کی گئی ہے۔
پاسپورٹ جمع کرانے کی شرط ختم
اس سال ایک بڑی سہولت فراہم کرتے ہوئے عازمین کے لیے پیشگی پاسپورٹ جمع کرانے کی شرط ختم کر دی گئی ہے۔ عازمین کو ہدایت دی گئی ہے کہ:اپنا اصل پاسپورٹ خود محفوظ رکھیں ،امبارکیشن پوائنٹ (روانگی مرکز) پر رپورٹنگ کے وقت پاسپورٹ ساتھ لائیں ،اگر کسی نے پہلے ہی پاسپورٹ جمع کرا دیا ہے تو پریشان ہونے کی ضرورت نہیں ،سفری دستاویزات صرف اصل پاسپورٹ دکھانے پر ہی جاری کیے جائیں گے
پاسپورٹ کی جانچ ضروری
عازمین کو تاکید کی گئی ہے کہ وہ اپنے پاسپورٹ کی مکمل جانچ پہلے ہی کر لیں ۔پاسپورٹ کی میعاد کم از کم 31 دسمبر 2026 تک ہونی چاہیے۔پاسپورٹ خراب، پھٹا یا ناقص حالت میں نہ ہو ، کم از کم دو خالی صفحات موجود ہوں ،ذاتی معلومات (نام، تاریخ پیدائش وغیرہ) درست ہوں ،کسی بھی خرابی یا غلطی کی صورت میں فوری طور پر متعلقہ اسٹیٹ حج کمیٹی سے رابطہ کریں ۔
فلائٹ بکنگ کی تصدیق لازمی
عازمین کو ہدایت دی گئی ہے کہ وہ حج سویدھا ایپ یا حج کمیٹی کے پورٹل کے ذریعے اپنی فلائٹ بکنگ کی تصدیق کریں اور اس کی رسید محفوظ رکھیں۔ یہی رسید حج کٹ حاصل کرتے وقت پیش کرنا لازمی ہوگا۔
روانگی کے وقت نئی ہدایات
عازمین کو اب 48 گھنٹوں کے بجائے 24 گھنٹے پہلے امبارکیشن پوائنٹ پر رپورٹ کرنا ہوگا ،جو عازمین سیدھے ایئرپورٹ جائیں، وہ کم از کم 6 گھنٹے پہلے پہنچیں ،تمام ضروری دستاویزات اور حج کٹ ساتھ رکھنا لازمی ہوگا۔
ضروری دستاویزات کی فہرست
گھر سے روانگی سے قبل درج ذیل دستاویزات کی موجودگی یقینی بنائیں۔اصل پاسپورٹ (پرانا و نیا، اگر ویزا پرانے پر ہے) ،ہیلتھ کارڈ / میڈیکل فٹنس و ویکسینیشن سرٹیفکیٹ ،ادائیگی کی رسیدیں ،فلائٹ کنفرمیشن کی دستخط شدہ رسید ،دیگر جاری کردہ دستاویزات ،
حج کٹ کی وصولی
حج کٹ، جس میں اسمارٹ واچ، شناختی کارڈ، ویزا اور دیگر سفری دستاویزات شامل ہوں گے، امبارکیشن پوائنٹ سے حاصل کیے جائیں گے۔ گروپ لیڈر (کور ہیڈ) تمام اراکین کی جانب سے یہ کٹ وصول کر سکتا ہے۔اگر کوئی عازم کسی اور کو اختیار دیتا ہے تو وہ اپنی ذمہ داری پر ہوگا، اور مجاز شخص کو اصل آدھار کارڈ اور دستخط شدہ اجازت نامہ پیش کرنا ہوگا۔حج کمیٹی نے تمام ریاستی و مرکزی زیر انتظام علاقوں کی حج کمیٹیوں کو ہدایت دی ہے کہ وہ ان معلومات کو وسیع پیمانے پر عازمین تک پہنچائیں تاکہ سفر کے دوران کسی قسم کی دشواری پیش نہ آئے۔
Post a Comment