کم عمر ڈرائیونگ کے خلاف بنگلورو میں خصوصی مہم کا آغاز
خلاف ورزی پر والدین اور گاڑی مالکان کے خلاف بھی کارروائی
بنگلورو 17 فروری (حقیقت ٹائمز)
شہر میں کم عمر افراد کی جانب سے گاڑی چلانے کے بڑھتے ہوئے واقعات اور مہلک حادثات کے پیش نظر بنگلورو ٹریفک پولیس نے خصوصی مہم شروع کرنے کا اعلان کیا ہے۔ حکام کے مطابق قانوناً مقررہ عمر سے پہلے گاڑی چلانا سنگین خلاف ورزی ہے، تاہم آگاہی پروگراموں کے باوجود بعض والدین اپنے بچوں کی نگرانی نہیں کر رہے، جس کے نتیجے میں جان لیوا حادثات پیش آ رہے ہیں۔حال ہی میں بنگلورو کے مضافاتی علاقے ہوسکوٹے کے قریب ایک حادثے میں کم عمر ڈرائیور کی ہلاکت کو اس سنگین مسئلے کی مثال قرار دیا گیا ہے۔ ٹریفک پولیس کی جانب سے جاری اعداد و شمار کے مطابق کم عمر ڈرائیونگ کے خلاف آئی ایم وی (موٹر وہیکل) ایکٹ کے تحت درج مقدمات کی تعداد میں مسلسل اضافہ ہو رہا ہے۔سال 2023 میں 95 مقدمات، 2024 میں 197 مقدمات اور 2025 میں 414 مقدمات درج کیے گئے۔اسی طرح وہیلنگ (خطرناک انداز میں موٹر سائیکل چلانے) کے واقعات میں بھی اضافہ دیکھا گیا ہے۔سال 2023 میں 242 وہیلنگ کے کیسز درج ہوئے جن میں 70 کم عمر افراد شامل تھے۔2024 میں 532 کیسز درج ہوئے جن میں 120 کم عمر ملزمان تھے۔2025 میں 646 کیسز درج کیے گئے جن میں 159 کم عمر افراد ملوث پائے گئے۔پولیس حکام نے واضح کیا ہے کہ خصوصی مہم کے دوران کم عمر ڈرائیوروں کے خلاف آئی ایم وی ایکٹ اور بی این ایس قانون کے تحت مقدمات درج کیے جائیں گے۔ اس کے علاوہ ایسے والدین یا گاڑی مالکان کے خلاف بھی قانونی کارروائی کی جائے گی جو کم عمر بچوں کو گاڑی چلانے کی اجازت دیتے ہیں۔ خلاف ورزی کی صورت میں گاڑی ضبط کر کے مالک یا والدین کو عدالت میں پیش کیا جائے گا۔ٹریفک پولیس نے عوام سے اپیل کی ہے کہ سڑکوں کی حفاظت ہم سب کی مشترکہ ذمہ داری ہے۔ والدین اپنے بچوں کو قانونی عمر سے پہلے گاڑی چلانے نہ دیں۔ اسکول اور کالج انتظامیہ بھی طلبہ میں ٹریفک قوانین کے بارے میں شعور بیدار کرنے میں تعاون کرے۔ شہریوں سے بھی گزارش کی گئی ہے کہ وہ ٹریفک قوانین کی پابندی کریں اور کم عمر ڈرائیونگ کی روک تھام میں پولیس کا ساتھ دیں۔حکام نے کہا ہے کہ ٹریفک قوانین پر عمل ہی حادثات کی روک تھام کا مؤثر ذریعہ ہے۔
Post a Comment