آئینِ ہند کی تمہید ہی ملک کی مضبوط بنیاد
ضلع و سیشن جج کے جی شانتی کا یومِ آئین تقریب سے خطاب
بلاری، 5 دسمبر (جی چندرکانتھ)
ضلع و سیشن جج کے جی شانتی نے کہا کہ سماجی، اقتصادی اور سیاسی انصاف، فکر و اظہارِ رائے کی آزادی، ایمان و مذہبی آزادی، مساوات، اخوت، جمہوریت اور انسانی وقار جیسے بنیادی اصول آئینِ ہند کی تمہید میں ہی سموئے گئے ہیں، اور یہی اصول ملک کی اصل اور مضبوط بنیاد ہیں۔وہ بلاری میں ویرشیوا ایجوکیشنل ٹرسٹ، ضلع عدلیہ اور ضلع لیگل سروسز اتھارٹی کے اشتراک سے منعقدہ یومِ آئین تقریب سے خطاب کر رہی تھیں۔ فاضل جج کے مطابق، 2015 میں حکومتِ ہند نے 26 نومبر کو یومِ آئین اور یومِ قانون کے طور پر منانے کا اعلان کیا تاکہ ڈاکٹر بی آر امبیڈکر کو خراجِ عقیدت پیش کیا جاسکے۔ انہوں نے کہا کہ ہندوستان کا آئین دنیا کا سب سے بڑا تحریری آئین ہے اور ملک میں بننے والے ہر قانون اور ضابطے کی بنیادی رہنمائی یہی آئین فراہم کرتا ہے۔انہوں نے مزید کہا کہ ملک میں مقننہ، عاملہ اور عدلیہ سمیت تمام حکومتی ادارے آئینی دائرے میں رہ کر کام کرنے کے پابند ہیں۔بنیادی حقوق اور بنیادی فرائض ہر شہری کی ذمہ داری اور شناخت ہیں، جنہیں نظرانداز نہیں کیا جا سکتا۔ کے جی شانتی نے کہا کہ “ہندوستان ایک ایسا ملک ہے جہاں مختلف مذاہب، زبانیں، ثقافتیں اور روایات مل کر وحدت کی مثال پیش کرتی ہیں۔ اگر ہم آئین کی روح کے مطابق زندگی گزاریں تو ایک بہتر شہری بن سکتے ہیں۔ آئین کے خلاف جانے سے نقصان بھی اٹھانا پڑتا ہے۔” انہوں نے وکلاء کو مشورہ دیا کہ آئین میں کی گئی ترامیم کے گہرے مطالعے کے ساتھ اپنی قانونی خدمات کو عام لوگوں کی انصاف تک رسائی کے لیے مزید مؤثر بنائیں۔تقریب میں آئین کی تمہید بھی اجتماعی طور پر پڑھ کر سنائی گئی۔ اس موقع پر ضلع لیگل سروسز اتھارٹی کے ممبر سیکریٹری راجیش این ہوسامنے، وکّی سنن رودرپّا لا کالج کے چیئرمین ٹی. نریندر بابو، ارکان چندرشیکھر، اوڈیدا پربھو دیوا، کالج کی پرنسپل ڈاکٹر کے. رجنیکماری سمیت تدریسی عملہ اور طلبہ موجود تھے۔
Post a Comment