ہم نے بی جے پی سے زیادہ میسور کی ترقی کے لیے کام کیا ہے۔ سدارامیا
ارسیکیرے، 26 جولائی (حقیقت ٹائمز)
وزیراعلیٰ سدارامیا نے کہا ہے کہ کانگریس حکومت نے میسور کی ترقی کے لیے بھارتیہ جنتا پارٹی (بی جے پی) کے مقابلے میں کہیں زیادہ مؤثر اور نمایاں اقدامات کیے ہیں۔میڈیا نمائندوں سے گفتگو کرتے ہوئے سدارامیا نے اس بیان پر ردعمل دیا جو ان کے بیٹے اور قانون ساز کونسل کے رکن ڈاکٹر یتیدرا سدارامیا نے دیا تھا، جس میں انہوں نے کہا تھا کہ "سدارامیا نے میسور کی ترقی کے لیے ’نالوڈی‘ مہاراجہ سے بھی زیادہ فنڈز جاری کیے۔" وزیراعلیٰ نے کہا کہ یہ حقیقت ہے کہ ہماری حکومت نے میسور میں بنیادی ڈھانچے، سڑکوں، صحت اور تعلیم کے شعبوں میں بی جے پی حکومت سے زیادہ ترقیاتی کام انجام دیے ہیں۔ عوام کی ضروریات کو مدنظر رکھتے ہوئے مستقبل میں بھی میسور کو ترجیح دی جائے گی۔ وزیراعلیٰ نے ہاسن میونسپل کارپوریشن کو فنڈز کی فراہمی سے متعلق سوال پر کہا کہ ریاستی محکمہ مالیات کے ڈپٹی سکریٹری کی جانب سے کارپوریشن کو تین سال تک فنڈز یا نئی اسامیوں کی منظوری نہ دینے کے سلسلے میں جو خط لکھا گیا ہے، اس کا تفصیلی جائزہ لیا جائے گا۔ انہوں نے کہا کہ مقامی ترقی کے کاموں کو متاثر نہیں ہونے دیا جائے گا۔ وزیراعلیٰ نے بتایا کہ آج کو ارسیکیرے میں 750 کروڑ روپے سے زائد مالیت کے مختلف ترقیاتی منصوبوں کا سنگ بنیاد رکھا گیا اور کئی منصوبوں کا افتتاح بھی کیا گیا ہے۔ انہوں نے کہا کہ ریاستی حکومت ہر ضلع میں متوازن ترقی کو یقینی بنانے کے لیے پر عزم ہے۔
Post a Comment