کولار میں اقلیتی رہائشی اسکولوں کے داخلہ امتحانات کل منعقد ہوں گے
شفاف طریقے سے ششم جماعت کے طلبہ کے انتخاب کا عمل مکمل کیا جائے گا
کولار، 11 اپریل (شبیر احمد)
ضلع کولار میں تعلیمی سال 2026-27 کے لیے اقلیتی طلبہ کے داخلے کا اہم مرحلہ کل طے ہوگا۔ محکمہ اقلیتی بہبود کے زیر اہتمام ڈاکٹر اے پی جے عبدالکلام رہائشی اسکولوں اور اقلیتی مورارجی دیسائی رہائشی اسکولوں میں ششم جماعت کے داخلے کے لیے مشترکہ داخلہ امتحان 12 اپریل کو منعقد کیا جائے گا۔محکمہ کی جانب سے جاری تفصیلات کے مطابق اس امتحان کے لیے درخواستیں سیوا سندھو پورٹل کے ذریعے طلب کی گئی تھیں، جس پر ضلع بھر سے بڑی تعداد میں طلبہ نے درخواستیں داخل کیں۔ انہی درخواستوں کی بنیاد پر اہل امیدواروں کے انتخاب کے لیے یہ مشترکہ امتحان منعقد کیا جا رہا ہے۔یہ امتحان کل صبح 11 بجے سے دوپہر 1 بجے تک ضلع کے مختلف مراکز پر بیک وقت منعقد ہوگا۔ امتحانی عمل اقلیتی ڈائریکٹوریٹ کی نگرانی میں مکمل شفافیت اور نظم و ضبط کے ساتھ انجام دیا جائے گا۔ضلع کولار میں ملباگل تعلقہ کے بالسندرا میں قائم اقلیتی مورارجی دیسائی رہائشی اسکول اور کولار تعلقہ کے گاجلدنہ میں واقع ڈاکٹر اے پی جے عبدالکلام رہائشی اسکول کو امتحانی مراکز کے طور پر منتخب کیا گیا ہے، جہاں طلبہ کے لیے تمام ضروری سہولیات فراہم کی گئی ہیں۔امتحان کے منظم انعقاد کے لیے ضلع اقلیتی بہبود افسر کو نوڈل افسر مقرر کیا گیا ہے، جبکہ ہر مرکز پر نگران عملہ تعینات کیا گیا ہے۔ طلبہ کو ہدایت دی گئی ہے کہ وہ مقررہ وقت سے قبل امتحانی مراکز پر پہنچیں اور ضروری دستاویزات اپنے ساتھ لائیں۔ضلع انتظامیہ اور محکمہ اقلیتی بہبود کی جانب سے امتحان کے کامیاب انعقاد کے لیے تمام تیاریاں مکمل کر لی گئی ہیں، اور امید ظاہر کی جا رہی ہے کہ یہ امتحان خوش اسلوبی کے ساتھ انجام پائے گا۔
Post a Comment