Deve Gowda Targets Siddaramaiah, Questions Social Justice; Flags Absence at Muslim Rally سدارامیا پر دیوے گوڑا کا وار، مسلم ریلی کا ذکر

سدارامیا حکومت پر دیوے گوڑا کی کڑی تنقید، سماجی انصاف صرف دعویٰ

مسلم امیدوار کی ریلی میں عدم شرکت کا حوالہ، قیادت کی سنجیدگی پر سوال

بنگلورو، 11 اپریل (حقیقت ٹائمز) 

سابق وزیر اعظم ایچ۔ڈی۔ دیوے گوڑا نے وزیر اعلیٰ سدارامیا پر شدید تنقید کرتے ہوئے الزام عائد کیا کہ موجودہ حکومت حقیقی معنوں میں سماجی انصاف کے اصولوں پر عمل نہیں کر رہی بلکہ اسے صرف سیاسی فائدے کے لیے استعمال کیا جا رہا ہے۔بنگلورو میں منعقدہ جنتا دل (سیکولر) کے اجلاس سے خطاب کرتے ہوئے انہوں نے کہا کہ وزیر اعلیٰ کو خود احتسابی کرتے ہوئے اپنے ضمیر سے سوال کرنا چاہیے کہ آیا وہ واقعی سماجی انصاف کے پابند ہیں یا نہیں۔ انہوں نے کہا کہ صرف نعرے بازی سے عوام کو دھوکہ نہیں دیا جا سکتا۔انہوں نے اپنی ساٹھ سالہ سیاسی زندگی کا حوالہ دیتے ہوئے کہا کہ انہوں نے اس سے زیادہ کمزور حکومت کبھی نہیں دیکھی۔ ان کے مطابق عوام اس حکومت سے نالاں ہیں اور وقت آنے پر مناسب جواب دیں گے۔

انہوں نے یہ بھی کہا کہ جب ایک دور میں ان کے زیرِ اہتمام ایک مسلم امیدوار کی کامیابی کے لیے منعقدہ ریلی میں اس وقت موجودہ وزیر اعلیٰ کی غیر حاضری ان کی سنجیدگی پر سوالیہ نشان ہے۔سابق وزیر اعظم نے مزید کہا کہ کانگریس کی بے وفائی کے باعث ہی جنتا دل (سیکولر) کو دوسرے اتحاد کا سہارا لینا پڑا۔ انہوں نے اپنے بیٹے کمار سوامی کی کارکردگی کی تعریف کرتے ہوئے کہا کہ وہ مؤثر انداز میں کام کر رہے ہیں، مگر ریاستی حکومت ان کے کام میں رکاوٹ ڈال رہی ہے۔خواتین کے لیے مخصوص نشستوں کے حوالے سے انہوں نے کہا کہ اس معاملے میں ان کی جماعت نے ابتدا سے ہی اہم کردار ادا کیا تھا۔ انہوں نے کہا کہ وہ عمر کے اس مرحلے میں بھی پارٹی کو مضبوط بنانے کے لیے پرعزم ہیں اور کارکنان کے ساتھ مل کر مستقبل میں بڑی سیاسی تبدیلی لانے کی کوشش کریں گے۔