Yathindra Siddaramaiah Urges Organised Political Movement for Social Justice اتحاد اور آئین کا تحفظ ہی سماجی انصاف کی بنیاد

بیدر میں اہندا قائدین کا اجلاس، محروم طبقات کے اتحاد پر زور

ڈاکٹر یتیندر سدارامیا نے آئینی تحفظ اور سیاسی بیداری کی اہمیت اجاگر کی

بیدر، 4 اگست (حقیقت ٹائمز)

 شہری ترقیات کے وزیر ڈاکٹر یتیندر سدارامیا نے کہا ہے کہ محروم اور پسماندہ طبقات کے لیے حقیقی سماجی انصاف، مساوات اور بااختیار نمائندگی صرف اس وقت ممکن ہے جب وہ تعلیمی، سماجی اور سیاسی سطح پر منظم ہو کر آگے بڑھیں۔ انہوں نے زور دے کر کہا کہ آئین کا تحفظ اور سیاسی شعور ہی پسماندہ طبقات کے روشن مستقبل کی ضمانت ہے۔وہ بیدر کے ڈاکٹر چن بسوا پٹدیور رنگ مندر میں کرناٹک ریاستی محروم طبقات اتحاد کے زیر اہتمام منعقدہ محروم طبقات (اہندا) قائدین کے اجلاس اور تہنیتی تقریب سے خطاب کر رہے تھے۔ڈاکٹر یتیندر سدارامیا نے کہا کہ صدیوں سے محرومی کا شکار طبقات کو متحد ہو کر اپنے حقوق کے لیے جدوجہد کرنی ہوگی۔ انہوں نے کہا کہ یہ اتحاد صرف ضلعی یا تعلقہ سطح تک محدود نہ رہے بلکہ ہر گاؤں تک پہنچنا چاہیے تاکہ عوام میں سیاسی بیداری پیدا ہو اور وہ اقتدار میں مؤثر نمائندگی حاصل کر سکیں۔انہوں نے کہا کہ درج فہرست ذاتوں اور درج فہرست قبائل کو ان کی آبادی کے تناسب سے ریزرویشن ملنا چاہیے۔ ان کا کہنا تھا کہ مساوات، آئینی حقوق اور سماجی انصاف کے تحفظ کے لیے آئین کی سلامتی انتہائی ضروری ہے، کیونکہ آئین محفوظ رہے گا تو ہی پسماندہ طبقات کا مستقبل بھی محفوظ رہے گا۔وزیر نے مزید کہا کہ مذہب اور سیاست کو الگ الگ رکھا جانا چاہیے تاکہ معاشرے کے تمام طبقات کو یکساں ترقی کے مواقع میسر آئیں۔ انہوں نے کہا کہ ایسا ماحول قائم ہونا چاہیے جہاں ہر شہری کو برابر کا احترام، مساوی مواقع اور سماجی انصاف حاصل ہو۔انہوں نے اس تاثر کو بھی مسترد کیا کہ سابق وزیر اعلیٰ سدارامیا کے انتخابی سیاست میں سرگرم نہ ہونے سے محروم طبقات کی جدوجہد کمزور پڑ جائے گی۔ انہوں نے کہا کہ کارکنان کو مایوس ہونے کے بجائے زیادہ جوش و جذبے اور اتحاد کے ساتھ پسماندہ طبقات کے حقوق کے لیے کام جاری رکھنا چاہیے۔اس موقع پر بیدر لوک سبھا حلقے کے رکن پارلیمان ساگر کھنڈرے، ضلع گارنٹی اسکیموں کی عمل آوری کمیٹی کے صدر امرت راؤ چمکوڈ، رکن اسمبلی رحیم خان، سابق رکن اسمبلی اشوک کھینی، کرناٹک ریاستی محروم طبقات اتحاد کے جنرل کنوینر کے۔ ایم۔ رام چندرپا، صدر بسوراج مالگے، دلت سنگھرش سمیتی کے کنوینر ماولی شنکر، بیدر پسماندہ طبقات اتحاد کے صدر ڈاکٹر راج شیکھر سیڈمکر، شہری ترقیاتی اتھارٹی کے صدر بسوراج جابشیٹی، درج فہرست ذات و قبائل ملازمین کی تنظیم کے صدر ڈاکٹر ملیکارجن کامبلے، جن وادی خواتین تنظیم کی صدر پروفیسر وجیہ لکشمی گڈے، ایم۔ آر۔ ایف۔ کے صدر ڈاکٹر مقصود چندا، آل انڈیا کانگریس کمیٹی کے درج فہرست ذاتوں کے شعبہ کے صدر راجیش لیلوٹیا سمیت متعدد عوامی نمائندے اور معزز شخصیات موجود تھیں۔