حضرت توکل مستانؒ عرس سے وزیرِ اعلیٰ کا اتحاد اور ہم آہنگی کا پیغام
ڈی۔ کے۔ شیوکمار نے ایس آئی آر کے تحت دستاویزات بروقت جمع کرانے پر زور دیا
بنگلورو، 4 اگست (حقیقت ٹائمز)
وزیر اعلیٰ ڈی۔ کے۔ شیوکمار نے کہا ہے کہ ریاستی حکومت سبھی طبقات کو ساتھ لے کر چلنے پر یقین رکھتی ہے اور بنگلورو سمیت ریاست کے کسی بھی حصے میں ناانصافی یا دباؤ کی سیاست کو برداشت نہیں کیا جائے گا۔وہ آج شام بنگلورو کے کاٹن پیٹ میں واقع حضرت توکل مستانؒ درگاہ کے سالانہ عرس کی تقریب سے خطاب کر رہے تھے۔وزیرِ اعلیٰ نے کہا کہ یہ ایک تاریخی اور مقدس درگاہ ہے اور مقامی رکن اسمبلی کے ذریعے یہاں کے عوام کے مسائل حکومت تک پہنچ چکے ہیں۔ انہوں نے یقین دلایا کہ عوام کی جائز ضروریات کو ترجیحی بنیادوں پر پورا کیا جائے گا۔ انہوں نے کہا کہ موجودہ حکومت عوام کی حکومت ہے اور اس کی کوشش ہے کہ ایسا نظم و نسق قائم کیا جائے جس سے کسی بھی طبقے یا برادری کے جذبات مجروح نہ ہوں۔انہوں نے کہا کہ عوام اپنی تجاویز، مسائل اور خدمات سے حکومت کو آگاہ کریں، حکومت ہر معاملے پر سنجیدگی سے غور کرے گی۔
ووٹنگ کا حق محفوظ رکھنے کی اپیل
وزیرِ اعلیٰ نے ووٹر فہرست کی خصوصی نظرِ ثانی (ایس آئی آر) کے حوالے سے عوام کو متوجہ کرتے ہوئے کہا کہ تمام اہل ووٹر مقررہ مدت کے اندر اپنی دستاویزات جمع کرا کر اپنے حقِ رائے دہی کو محفوظ بنائیں۔ انہوں نے کہا کہ اگر ووٹنگ کا حق برقرار نہ رہا تو مستقبل میں مختلف سرکاری سہولتوں کے حصول میں مشکلات پیش آ سکتی ہیں۔انہوں نے بتایا کہ درخواستیں 8 اگست تک جمع کرائی جا سکتی ہیں۔ ان کے مطابق الیکشن کمیشن نے تقریباً 1 کروڑ ووٹروں کی معلومات میں خامیوں کی نشاندہی کی ہے، اس لیے ہر شہری کو چاہیے کہ وہ اپنی تفصیلات کی بروقت تصدیق کرائے۔ انہوں نے کہا کہ جمہوری نظام میں ووٹ کا حق سب سے بڑی طاقت ہے اور اس کا تحفظ ہر شہری کی ذمہ داری ہے۔
تمام مذاہب امن اور انسانیت کا درس دیتے ہیں
وزیرِ اعلیٰ نے کہا کہ تقریباً 400 سال قدیم اس مذہبی مرکز کا پیغام انسانیت، بھائی چارے اور اتحاد ہے۔ انہوں نے کہا کہ مذہب کوئی بھی ہو، اس کی اصل تعلیم محبت، امن اور انسانیت ہے۔انہوں نے کہا کہ کوئی بھی شخص اپنی مرضی سے کسی مذہب یا برادری میں پیدا نہیں ہوتا، بلکہ ہر انسان اپنے بزرگوں کی رہنمائی میں پروان چڑھتا ہے۔ مذہب کا مقصد معاشرے میں امن، سکون اور باہمی احترام کو فروغ دینا ہے، اور دنیا کا کوئی بھی مذہب دوسروں سے نفرت کی تعلیم نہیں دیتا۔وزیرِ اعلیٰ نے کہا کہ حضرت محمد ﷺ نے انسانیت کو سب سے بڑا دین قرار دیا ہے اور یہی پیغام دنیا میں امن و آشتی کی بنیاد ہے۔اس موقع پر انہوں نے سابق وزیر دنیش گنڈو راؤ کی عوامی خدمات کی بھی ستائش کرتے ہوئے کہا کہ عوام نے ان پر اعتماد کا اظہار کیا ہے اور آئندہ بھی انہیں مزید مضبوط حمایت حاصل ہونی چاہیے۔
Post a Comment