گرہا لکشمی اسکیم بند نہیں ہوگی، صرف جانچ اور نظرثانی کا عمل جاری ہے — دنیش گولی گوڈا
اہل خواتین کو کوئی نقصان نہیں، غیر مستحقین کی روک تھام کے لیے تصدیقی اقدامات
بنگلورو، 11 جون (حقیقت ٹائمز)
ریاستی حکومت کی اہم فلاحی اسکیم گرہا لکشمی یوجنا کو بند کرنے کے بارے میں گردش کرنے والی خبروں کو مسترد کرتے ہوئے کرناٹک ریاستی گارنٹی اسکیموں کے نفاذی ادارے کے نائب صدر اور رکن قانون ساز کونسل دنیش گولی گوڈا نے واضح کیا ہے کہ حکومت کا اس اسکیم کو بند کرنے کا کوئی ارادہ نہیں ہے، بلکہ صرف اس کی جانچ، تصدیق اور نظرثانی کا عمل انجام دیا جا رہا ہے تاکہ فوائد صرف مستحق افراد تک پہنچ سکیں۔ انہوں نے کہا کہ اپوزیشن جماعتیں سیاسی مقاصد کے تحت بے بنیاد پروپیگنڈہ کر رہی ہیں اور عوام میں غلط فہمیاں پیدا کرنے کی کوشش کر رہی ہیں، جبکہ حقیقت یہ ہے کہ حکومت اسکیم کو مزید مؤثر اور شفاف بنانے کے لیے اقدامات کر رہی ہے۔دنیش گولی گوڈا کے مطابق ریاست میں اب تک تقریباً ایک کروڑ چوبیس لاکھ سے زائد خواتین سربراہانِ خاندان کو ہر ماہ دو ہزار روپے کی مالی امداد فراہم کی جا رہی ہے۔ تاہم حالیہ اعداد و شمار سے معلوم ہوا ہے کہ تقریباً ایک لاکھ پچانوے ہزار سے زائد مستفید خواتین کا انتقال ہو چکا ہے، لیکن بعض تکنیکی وجوہات کی بنا پر ان کے بینک کھاتوں میں بھی رقم منتقل ہوتی رہی ہے۔انہوں نے کہا کہ اس صورتحال کی اصلاح اور سرکاری فنڈز کے غلط استعمال کو روکنے کے لیے حکومت ضروری اقدامات کر رہی ہے تاکہ عوامی سرمایہ صرف حقیقی اور اہل مستفیدین تک پہنچے۔
لائف سرٹیفکیٹ کی تجویز
دنیش گولی گوڈا نے بتایا کہ انہوں نے سابق وزیر اعلیٰ سِدارامیا کو تحریری طور پر تجویز دی تھی کہ مستفیدین کے لیے "لائف سرٹیفکیٹ" لازمی قرار دیا جائے تاکہ انتقال کر جانے والے افراد کے نام پر رقم کی ادائیگی روکی جا سکے۔انہوں نے مزید کہا کہ موجودہ وزیر اعلیٰ ڈی کے شیوکمار کو بھی انہوں نے اسکیم کا مکمل آڈٹ اور تصدیقی عمل (Verification) شروع کرنے کی درخواست کی ہے، تاکہ فوت شدہ اور غیر مستحق افراد کو فہرست سے خارج کیا جا سکے۔
اہل مستفیدین کو کوئی پریشانی نہیں ہوگی
انہوں نے زور دے کر کہا کہ حکومت کا مقصد کسی بھی اہل خاتون کو اسکیم سے محروم کرنا نہیں ہے۔ جو خواتین قانونی طور پر اس اسکیم کی مستحق ہیں، انہیں بدستور مالی امداد ملتی رہے گی اور انہیں کسی قسم کی پریشانی یا نقصان کا سامنا نہیں کرنا پڑے گا۔دنیش گولی گوڈا نے عوام سے اپیل کی کہ وہ اپوزیشن کی جانب سے پھیلائی جانے والی افواہوں اور سیاسی بیانات پر یقین نہ کریں اور حکومت کی جانب سے جاری کردہ مصدقہ معلومات پر ہی اعتماد کریں۔انہوں نے کہا کہ گِرہا لکشمی اسکیم ریاست کی خواتین کی معاشی خودمختاری کے لیے ایک اہم اقدام ہے اور حکومت اس کے شفاف اور مؤثر نفاذ کے لیے پوری طرح سنجیدہ ہے۔
Post a Comment