کرناٹک سے راجیہ سبھا کی چار نشستوں پر کانگریس کے تین اور بی جے پی کا ایک امیدوار منتخب
ملیکارجن کھرگے، پون کھیرا، منصور علی خان اور ایم ناگراج بلا مقابلہ کامیاب
بنگلورو، 11 جون (حقیقت ٹائمز)
کرناٹک اسمبلی سے راجیہ سبھا کی چار نشستوں کے لیے ہونے والے انتخاب میں کانگریس کے تین اور بھارتیہ جنتا پارٹی (بی جے پی) کے ایک امیدوار بلا مقابلہ منتخب ہو گئے ہیں۔انتخابی افسر ایم۔ کے۔ وشالاکشی نے باضابطہ طور پر اعلان کیا کہ کانگریس کے امیدوار ملیکارجن کھرگے ، پون کھیرا اور منصور علی خان جبکہ بی جے پی کے امیدوار ایم ناگراج راجیہ سبھا کے لیے بلا مقابلہ منتخب قرار پائے ہیں۔نامزدگیوں کی جانچ اور دستبرداری کی مدت مکمل ہونے کے بعد نشستوں کے مقابلے میں اتنے ہی امیدوار میدان میں رہ گئے تھے، جس کے باعث ووٹنگ کی ضرورت پیش نہیں آئی اور چاروں امیدواروں کو بلا مقابلہ منتخب قرار دے دیا گیا۔اس انتخاب کے ذریعے کانگریس نے اپنی تین نشستیں برقرار رکھنے میں کامیابی حاصل کی، جبکہ بی جے پی کے حصے میں ایک نشست آئی۔ انتخابی نتائج کے اعلان کے بعد کانگریس اور بی جے پی کے قائدین و کارکنان نے منتخب امیدواروں کو مبارکباد پیش کی۔راجیہ سبھا کے لیے منتخب ہونے والے یہ چاروں رہنما جلد ہی پارلیمنٹ کے ایوانِ بالا میں کرناٹک کی نمائندگی کریں گے۔
Post a Comment