کرناٹک میں ’کے-جی آئی ایس 2.0‘ کے نفاذ کا آغاز، انتظامی نظام میں ٹیکنالوجی کا استعمال بڑھایا جائے گا
مصنوعی ذہانت اور سیٹلائٹ ڈیٹا کے ذریعے نگرانی، شفافیت اور کارکردگی میں بہتری ہدف
کلبرگی، 17 اپریل (جی چندراکانتھ)
ریاستی انتظامیہ میں شفافیت اور کارکردگی کو فروغ دینے کے مقصد سے حکومتِ کرناٹک نے جدید ٹیکنالوجی پر مبنی منصوبہ کے-جی آئی ایس 2.0 نافذ کرنے کا فیصلہ کیا ہے۔ یہ بات کرناٹک اسٹیٹ ریموٹ سینسنگ اپلیکیشن سینٹر کے ڈائریکٹر ڈاکٹر راجیش این ایل نے کہی۔وہ کلبرگی میں منعقدہ ضلع سطحی ورکشاپ کے افتتاحی اجلاس سے خطاب کر رہے تھے، جس کا انعقاد کرناٹک اسٹیٹ ریموٹ سینسنگ اپلیکیشن سینٹر، محکمہ انتظامی اصلاحات (ای-گورننس) اور ضلع انتظامیہ کے اشتراک سے کیا گیا تھا۔انہوں نے بتایا کہ یہ منصوبہ 2025-26 سے 2027-28 کے دوران مرحلہ وار نافذ کیا جائے گا، جس میں مصنوعی ذہانت، مشین لرننگ اور جدید سیٹلائٹ امیجنگ ٹیکنالوجی کا استعمال کیا جائے گا۔ اس نظام کے ذریعے غیر قانونی کانکنی کی روک تھام، جنگلاتی زمین پر قبضوں کا سدباب اور فصل بیمہ میں ہونے والی بے ضابطگیوں کو کم کرنے میں مدد ملے گی۔ڈاکٹر راجیش کے مطابق یہ جدید ٹیکنالوجی 30 سینٹی میٹر تک کی باریک اشیاء کی نشاندہی کرنے کی صلاحیت رکھتی ہے اور حقیقی وقت میں معلومات فراہم کرے گی، جس سے کسانوں اور طلبہ کو بھی فائدہ پہنچے گا۔انہوں نے مزید کہا کہ اس منصوبے کو نچلی سطح تک مؤثر بنانے کے لیے ضلع سطح پر افسران کو تربیت اور ورکشاپس فراہم کی جا رہی ہیں، جس سے ڈیٹا پر مبنی حکمرانی کو نئی قوت ملے گی۔اس موقع پر میونسپل کمشنر اویناش شندے نے کہا کہ شہری انتظامیہ کو ڈیجیٹل بنانے کے لیے کے-جی آئی ایس 2.0 نہایت اہم ہے۔ اس سے ٹیکس کی چوری روکنے اور شہری جائیدادوں کا درست ریکارڈ تیار کرنے میں مدد ملے گی۔ ڈرون سروے اور تھری ڈی میپنگ کے ذریعے غیر قانونی تعمیرات اور اضافی منزلوں کی نشاندہی آسان ہو جائے گی، جس سے بلدیہ کی آمدنی میں اضافہ ہوگا۔تقریب میں اسسٹنٹ کمشنر ساہتیہ آلادکٹی، سب ڈویژنل اسسٹنٹ کمشنر پربھو ریڈی سمیت دیگر افسران نے بھی خطاب کیا اور انتظامی و ترقیاتی امور میں سیٹلائٹ ٹیکنالوجی کی اہمیت پر زور دیا۔ورکشاپ میں سائنٹفک آفیسر لکشمو جی نے پاورپوائنٹ کے ذریعے منصوبے کی تفصیلات پیش کیں۔ اس موقع پر ایڈیشنل سپرنٹنڈنٹ آف پولیس مہیش میگھننور، ضلع پنچایت کے نائب سکریٹری لکشمن شرنگیری اور دیگر اعلیٰ افسران و محکمہ جاتی نمائندے بھی موجود تھے۔
Post a Comment