شولاپور ڈویژن میں امبیڈکر جینتی عقیدت سے منائی گئی
مرکزی ریلوے کی تقریب میں خراجِ عقیدت، مقابلۂ مضمون نویسی کا انعقاد
شولاپور، 16 اپریل (جی چندراکانتھ)
سنٹرل ریلوے کے شولاپور ڈویژن کی جانب سے بھارت رتن ڈاکٹر بھیم راؤ رام جی امبیڈکر کی 135ویں یومِ پیدائش بدھ کے روز ڈویژنل ریلوے منیجر کے دفتر میں نہایت عقیدت و احترام کے ساتھ منائی گئی۔ اس بات کی اطلاع مرکزی ریلوے شولاپور ڈویژن کے محکمۂ تعلقاتِ عامہ نے ایک پریس ریلیز میں دی۔اس موقع پر ڈویژنل ریلوے منیجر سُجیت مشرا اور ایڈیشنل ڈویژنل ریلوے منیجر انشومالی کمار نے ڈاکٹر امبیڈکر کی تصویر پر گلپوشی کرتے ہوئے خراجِ عقیدت پیش کیا۔ تقریب کے دوران اجتماعی طور پر بدھ وندنا بھی پیش کی گئی۔تقریب کے تحت ایک مضمون نویسی مقابلہ بھی منعقد کیا گیا، جس کا موضوع “ڈاکٹر بی آر امبیڈکر: بھارت میں سماجی انصاف کے معمار” تھا۔ مقابلے میں کامیاب ہونے والے طلبہ کو ڈویژنل ریلوے منیجر کی جانب سے نقد انعامات اور توصیفی اسناد سے نوازا گیا۔اس موقع پر اپنے خطاب میں سُجیت مشرا نے ڈاکٹر امبیڈکر کی فکر، اقدار اور قوم کی تعمیر و سماجی انصاف کے لیے ان کی غیر معمولی خدمات پر روشنی ڈالی۔ انہوں نے افسران اور ملازمین سے اپیل کی کہ وہ بابا صاحب کے اصولوں کو اپنی عملی زندگی میں اپنائیں۔اس پروگرام کا انعقاد عملہ (پرسنل) محکمہ کی جانب سے کیا گیا، جس میں ریلوے کے افسران، ملازمین، تسلیم شدہ یونینوں اور مختلف تنظیموں کے نمائندوں نے شرکت کی۔
Post a Comment